សមុទ្រផ្តល់នូវជម្រកចំនួន ៩៩% ដែលគ្រប់ភាវរស់នៅលើផែនដីអាចរស់នៅបាន។ យើងពឹងផ្អែកលើសមុទ្រសម្រាប់អាហារ ឱសថ ថាមពល និងវត្ថុធាតុដើមសម្រាប់ជីវិតប្រចាំថ្ងៃរបស់យើង។
ទោះបីជាយ៉ាងណាក៏ដោយ ជីវចម្រុះរបស់សមុទ្រ ស្ថានប្រព័ន្ធដ៏សម្បូរបែបរបស់វា និងជីវភាពរស់នៅរបស់សហគមន៍នៅតាមឆ្នេរសមុទ្រជាច្រើន បាននឹងកំពុងទទួលរងនូវការគំរាមកំហែង។
សំណល់ប្លាស្ទិកកំពុងបំផ្លាញជីវិតនៅក្នុងសមុទ្រ និងបំពុលសមុទ្រក្នុងកម្រិតដែលមិនធ្លាប់មានពីមុនមក។ សំណល់ប្លាស្ទិកមិនមានព្រំដែន ធ្វើដំណើរឆ្លងកាត់សមុទ្រ ទន្លេ និងដីសណ្ត ដែលប៉ះពាល់ដល់សង្គម និងសេដ្ឋកិច្ច។ វាក៏ជាកត្តាជំរុញដ៏សំខាន់មួយនៃការប្រែប្រួលអាកាសធាតុផងដែរ៖ ការបំភាយពីប្លាស្ទិកនឹងឈានដល់ ១៧% នៃថវិកាកាបូនពិភពលោក ក្នុងរយៈពេលបីទសវត្សរ៍ខាងមុខ។
ប្រសិនបើគ្មានវិធានការទេនោះ យើងនឹងមានហានិភ័យដោយប្លាស្ទិកនៅក្នុងសមុទ្រនឹងមានចំនួនច្រើនជាងត្រី ត្រឹមឆ្នាំ២០៥០។
ស្ថិតក្រោមការដឹកនាំរបស់កម្មវិធីអភិវឌ្ឍន៍របស់អង្គការសហ-ប្រជាជាតិ (UNDP) ដោយមានការគាំទ្រពីក្រសួងការបរទេស ន័រវេស និងទីភ្នាក់ងារន័រវេសសម្រាប់កិច្ចសហប្រតិបត្តិការអភិវឌ្ឍន៍ (Norad) ការប្រកួតប្រជែងផ្នែកនវានុវត្តន៍សម្រាប់ការបញ្ចប់ការបំពុលដោយប្លាស្ទិក (EPPIC) គឺជាការប្រកួតប្រជែងទូទាំងអាស៊ាន ដែលអំពាវនាវឱ្យនវានុវត្តករគ្រប់រូប ចែករំលែកគំនិតដ៏ភ្លឺស្វាងរបស់ពួកគេក្នុងការដោះស្រាយការបំពុលដោយប្លាស្ទិកទៅកាន់ពិភពលោក។ ដំណាក់កាលទីមួយត្រូវបានអនុវត្តនៅប្រទេសវៀតណាម និងប្រទេសថៃ ក្នុងឆ្នាំ២០២១ ដំណាក់កាលទីពីរត្រូវបានអនុវត្តនៅប្រទេសឥណ្ឌូនេស៊ី និងប្រទេសហ្វីលីពីន ក្នុងឆ្នាំ២០២២ ហើយនៅឆ្នាំ២០២៣ EPPIC កំពុងអនុវត្តនៅប្រទេសឡាវ និង ប្រទេសកម្ពុជា។ EPPIC ផ្តល់ឱកាសដ៏គួរឱ្យរំភើបសម្រាប់នវានុវត្តករ ក្នុងការទទួលបានមូលនិធិគ្រាប់ពូជ និងការបណ្តុះបណ្តាលធុរកិច្ចថ្មី ដើម្បីជួយពួកគេបង្កើនឱកាសនៃភាពជោគជ័យរបស់ពួកគេជាអតិបរមា។
